БАКТЫЛУУЛУК ФОРМУЛАСЫ

Абдишүкүр ажы Нарматов

Бисмил-Лаахир-рохмаанир-рохиим. Мээримдүү жа на ырайымдуу Аллахтын аты менен баштаймын. Ааламдар дын жаратуучусу Аллах Таалага мактоо айтабыз. Андан жардам сурайбыз, кетирген күнөөлөрүбүздү кечирүүсүн суранабыз. Напсибиздин жана амалдарыбыздын жамандыгынан коргоо тилейбиз.
Аллахым, биз менен арамды, чыгыш менен батыштай алыс кыл жана адал жашоонун үстүндө өмүр сүрүүнү насип кыл.
Аллахым, бизге туураны туура көрсөтүп, туура жолуңда алып жүр. Катааны катаа көрсөтүп, адашуудан өзүң сакта.
Аллахым, ар бирибизди пайдасыз илимден сакта. Өзүңдөн коркпогон жүрөктөн сакта. Кабыл кылынбаган дубадан сакта. Өзүңө көтөрүлбөгөн амалдан сакта.
Күбөлүк берем Ал, Аллах жалгыз, Анын шериги жок, Ал бардык нерсеге күчү жетүүчү, Кудреттүү. Ал, Аллах адамзатты жоктон бар кылган жана аны жок кылып кайра тирилтүүгө кудреттүү. Ал, Аллах пендени өзүнө ибаадат кылуу үчүн жараткан жана биз Ага ибаадат кылууга милдеттүүбүз.
Күбөлүк берем Мухаммад (Ага Аллахтын салам-салаваты болсун) Аллахтын элчиси жана кулу. Ал, Пайгамбар адамдарга бул дүнүйөнүн убактылуу экен дигин эскертип, чыныгы жашоого азык камдоого чакырган.
Өз үммөтүнө бул дүйнөдө мусапырдай жашап өтүүнү осуят кылган улуу Пайгамбарыбыз Мухаммадка, анын үй-бүлөөсүнө жана сахабаларына Аллахтын салам-салаваты болсун.

Урматтуу мусулман бир тууганым!

Бүгүнкү сабагыбыз, Аллахты Жаратуучум деп, Исламды диним деп, Мухаммад пайгамбарды (Ага Аллахтын салам-салаваты болсун) Пайгамбарым деп ыраазы болгон мусулмандарга арналат. Ошондой эле өзүн мусулманмын деп эсептеп, бирок мусулмандык милдетин аткарбастан, жүрөгү таштай катып калган бир туугандарыма арналат. Ошондой эле, күн сайын бул жашоодон канчалаган адамдарды алып кетип жаткан өлүмдү көрүп туруп, ага даярданбаган, дүнүйөсүн кооздоп, акыретин эсинен чыгарып койгон, мүрзөлөрдү көрүп туруп, өлүмдөн коркпогон адамдарга да эскертүү болот деп ишенемин.

Урматтуу мусулман бир тууганым!

Эртең сапарга чыгасың. Сапарың анча деле алыс эмес. Ашып кетсе беш же алты күн жүрөсүң. Бирок сапарың жакын, андан кайтууң бат болгонуна карабастан бул сапарга канча күн мурда даярдана баштайсың. Алгач, кийүүчү кийимдериңди, андан соң тамак-ашыңды жолго керектелүүчү буюм-теримдериңди, акырында чыгым кылуучу акчаңды даярдайсың. Ушунун баары сенин беш-алты күндүк сапарыңдын жеңил болуусу үчүн жасалат. Сапарга азыгы жок чыгуу, кемеси жок деңизге кирген менен барабар. Биздин бул дүйнөдөгү жашообуз, чыныгы жашоо болгон акырет сапарына даярданып алуу үчүн токтой калган аялдама сыяктуу. Ким акырет сапарына жакшы даярдык көрсө, сапары жеңил болот. Ким сапарына даярданбаса кыйынчылыкка дуушар болуусу анык.
Пайгамбарыбыз Мухаммад (Ага Аллахтын салам-салаваты болсун) бир жолу Умар ибни Абдуллахка (Аллах андан ыраазы болсун) карап:
– «Эй Абдуллах. Бул дүйнөдө чоочун жолоочудай болгун. Өзүңдү мүрзөдөгүлөрдүн биримин деп эсептегин» – деп осуят кылган. Чындыгында, бул дүйнөгө ким түркүк болуп калат?! Эч ким. Эч ким эч качан бул дүйнөдө түбөлүк калган эмес. Анткени, бул дүйнө акырет эшигине алып баруучу кичинекей гана өткөөл. Бул кичинекей өткөөлгө, алыс сапарга камданып, азык топтоп алуу үчүн гана келгенбиз. Бул мезгилде кандай амал жасап калсаң, эртең аны көрөсүң. Жибрийил (Ага Аллахтын салам-салаваты болсун) бир күнү Пайгамбарыбыздын (Ага Аллахтын салам-салаваты болсун) жанына келип:
– «Эй Мухаммад, бул дүйнөдө каалаганыңдай жаша, бир күнү баары бир өлөсүң. Каалаган амалдарыңды жаса, бир күнү анын сообун же азабын көрөсүң. Каалаганың менен дос болуп, жакшы көргүн, бир күнү андан ажырайсың. Ыймандуунун улуулугу, анын түнкү намаздарды көп окугандыгында. Ыймандын кадыры, башкалардан кажаатсыз болууда» – деп осуят кылды. Эмне үчүн хадисте өлүм тууралуу, бул дүйнөнүн кыскалыгы тууралуу айтылып келип, ага түнкү намазды кошуп койду? Анткени өлүм бүтүү эмес. Өлүм жоголуу эмес. Өлүм, бул башталуу. Өлүмдүн артында бул дүйнөдө жасаганыңа жооп берүүчү күн турат. Демек өлүмдү эстеген адам, ага даярданууну да унутпоосу керек. Түнкү намаз ибаадаттардын эң жакшысы, акырет үчүн пайдалуу азык. Түн ичинде окулган намаз кабырда нур болот.
Хасан Ал-Басрий (Аллах андан ыраазы болсун) кара-тору адам эле. Бирок анын жүзүнөн ар дайым нур чачырап тураар эле. Бир жолу адамдар андан эмне үчүн жүзүндө нур жаркырап тургандыгы жөнүндө сурашканда, ал:
– Түн ичинде Аллахка жалбарып ибаадат кылам, ошол себептен жүзүмө нур чыгат – деп жооп берет. Акырет үчүн азык камдоого шашылуу акылдуу адамдын иши. Өлүм эскертүүсүз келет. Пайгамбарыбыз (Ага Аллахтын салам-салаваты болсун) бир хадисинде:
– «Өлүмдү көбүрөөк эстегиле, ал эч кандай эскер түүсүз келет» – деп айткан. Өлүмдү эстебеген адам, эртең жөнөөчү сапарын унутуп койгон адам сыяктуу. Эч кандай даярдыгы жок сапарга жөнөгөн адамды элестетип көргүн. Аны машина күтүп турат же самолётко билети бар. Качан гана жөнөө убактысы келгенде, ал өтө шашылат. Бирок, эми даярданууга кеч болуп калды. Бул дүйнөнүн кызыгына азгырылып, акырети үчүн даярдык көрбөгөн адамга өлүм келгенде, даярданууга кеч болуп калат. Өлүмдү бир-эки мүнөт коё тур деп күттүрүп коё албайсың.
Пайгамбарыбыздын (Ага Аллахтын саламсалаваты болсун) күйөө баласы Алиге (Аллах андан ыраазы болсун) бир адам келип, бирөөдөн короо жай сатып алгандыгын, кийин аны кайрадан талашып алып албоосу үчүн, күбө болуп, бир кагаз жазып берүүсүн өтүнөт.
Али (Аллах андан ыраазы болсун) ал адамдын дүнүйөгө аябай берилген адам экендигин байкайт. Кагазын алат да «Бир өлүүчү адам, экинчи өлүүчү адамдан короо-жай сатып алды. Ал короонун төрт тарабы бар. Анын биринчиси адам өлгөндө түгөнөт. Экинчиси, мүрзөгө киргенде түгөнөт. Үчүнчүсү, Аллахтын алдында эсеп-кысап бергенде түгөнөт. Ал эми төртүнчүсү, же бейиш же тозок менен аяктайт» деп жазып берет. Тиги адам жакшы түшүнө албай, мен сенден күбөлүк кат жазып бер десем, сен өлүм жөнүндө жазыпсың деп таң алат. Ошондо Али: (Аллах андан ыраазы болсун) «дүнүйөгө көп берилбегин. Бул дүнүйө түбөлүктүү эмес. Эртели кеч жөнөөчү сапарыңды унутпа» деп насаат айтат.
Падыша Харун Рашиддин бир вазири бар эле. Анын милдети падышага насаат айтып, акыретти эстетип туруу болчу. Бир күнү падыша вазирин чакырып, мага насаат айткын дейт. Вазир падышага кайрылып мындай дейт:
– урматтуу падышам, эгер сиз катуу ооруп калсаңыз жана бул оорунун дарысы бир чөйчөк суу болсо, бирок ал суунун баасы өтө кымбат болсо, эмне кылат элеңиз? – дейт. Падыша бир топко ойлонуп:
– мен аны колумдагы мүлктүн жарымын берип болсо да сатып алмакмын – дейт. Ошондо вазири кайрадан:
– Ал эми ошол сууну ичкенден кийин аны кайра чыгара албай кыйналсаңыз эмне кылат элеңиз – деп сурайт. Падыша дагы көпкө ойлонуп туруп:
– дүнүйөмдүн калганын берип болсо да дарыланмакмын – деп жооп берет. Анда вазир:
– урматтуу падышам, сиздин падышалык мүлкүңүз Аллахтын берген ден-соолук нээматынын алдында эки чөйчөк суучалык кадыры жок болгон соң, демек өлүмдү көбүрөөк эстеп жүрүңүз – деп насаат кылган экен.

Урматтуу мусулман бир тууганым!

Сапарга чыгуудагы максатын билбеген адам, ал сапарга даярдык көрө албайт. Бул жашоодогу мак сатын билбеген адам, акыретине даярдана албайт. Бул жашоого Аллахтын сыноосунан өтүү үчүн, Анын буйруктарын аткаруу үчүн келгенбиз. Аллах Таала Кураанда: «Жиндерди жана адамдарды өзүмө ибаадат кылуу үчүн гана жараттым. Мен алардан ырыскы да жана алар мени азыктандыруусун да каалабаймын. Чындыгында Аллах ырыскы берүүчү жана Ал, Күч-кубаттын ээси» деп айткан. Ошондой эле, экинчи бир аятта: «Оо, ыйман келтиргендер! Руку жана сежде кылып Эгеңерге сыйынгыла жана (адамдарга, туугандарыңарга) жакшылык кылгыла. Балким, (тозоктон) кутулаарсыңар» деп айткан. Пенденин милдети Аллахка руку сежде кылып сыйынуу менен бирге башкаларга жакшы мамиле кылуу. Адамдын бул дүйнөгө жаратылуусунун мындан башка максаты жок. Аллах Таала хадиси кудусийде: «Эй адам баласы, мен жалгыздыгымдан сени жолдош болсун деп жараткан эмесмин. Мен аздыгымдан сени көп болсун деп жараткан эмесмин. Кайсы бир амалды аткара албай калсам жардам берет деп жараткан эмесмин. Кимдир бирөөгө менин менен бирге пайда же зыян берет деп да жараткан эмесмин. Мен сени күнү-түнү мага ибаадат кылууң үчүн жаратканмын» дейт. Демек, ибаадат кылуу жума күнү мечитке келип коюу же айт намазын окуп коюу эмес экен. Аллахка өмүр бою, күнүтүнү ибаадат кылуу керек. Анткени, өмүр өтө кыска жана өлүм эскертпестен келет. Сахабалардан кийинки доордо жашаган Мухаммад ибни Каьбий аттуу өтө бай адам болгон. Ал адам ооруп төшөккө жатып калганда, достору келип ага келме айтышып, балдары үчүн эмнени мурас кылып калтырганын сурашат. Алардын суроосуна: Жыйган байлыгымдын баарын акыретим үчүн жөнөтүп жибердим. Ал эми балдарыма Аллахты гана калтырдым. Эгер мен балдарыма мал-дүнүйө калтырсам, күндөрдүн биринде ал баары бир түгөнөт. Ал эми алар такыбаа болушса, Аллах ойго келбеген жерден ырыскы берет. Ал эми Аллахтын казынасы эч качан түгөнбөйт – деп жооп берет.

Урматтуу мусулман бир тууганым!

Өлүм периштеси эшигиңди кагып кирип келгенче акырет үчүн азык камдап ал. Өлүм периштеси келген соң аны кайтара албайсың, андан качып да кете албайсың. Болгону өкүнүч менен гана кете бересиң. Пайгамбарыбыздын (Ага Аллахтын салам-салаваты болсун) жакын сахабаларынын бири, эң көп хадисти бизге жеткирген Абу Хурайра (Аллах андан ыраазы болсун) өлүм төшөгүндө жаткан мезгилде көз жашын агызып ыйлайт. Анын ыйлаганына таң калышкан адамдар, эмне үчүн ыйлап жатканын сурашканда, ал: мени бул жашоо дон кетип жатканы үчүн ыйлап жатат деп ойлойсуңарбы? Жок, мен сапардын алыстыгын көрүп, азыгымдын аздыгын эстеп ыйлап жатам – деп жооп берет. Ар бир пенденин башына бул күн келет. Улуу сахаба ушинтип өкүнүп ыйласа, эч нерсе менен иши жок кайдыгер жашоо өткөзгөн пенделердин абалы кандай болот. Күн өтүп жатат. Күн өткөн сайын өмүр азайып сапарга чыкчу күн жакындап келе жатат. Ар бир күнүбүздү, ар бир саатыбызды, ар бир минутабызды акырет азыгы үчүн жумшоого аракетенүүбүз керек. Аллахтын алдына барган кезде беш нерсеге жооп бермейинче бир кадам да алдыга жыла албайсың.
Биринчи: Аллах берген аздыр-көптүр өмүрдү кайда жумшадың.
Экинчи: Аллах берген күч-кубаттуу жаштыгыңды кандай пайдаландың.
Үчүнчү: мал дүнүйөңдү кандай жол менен таптың.
Төртүнчү: ошол тапкан мал-дүнүйөңдү кандай иштерге сарптадың.
Бешинчи: Билген илимиңе кандай амал кылдың. Мына ушул беш нерсени эстеп, ага жооп берүүгө да даярдык көр.

Диндеги эң такыба деген атка конгон Хасан Ал-басрий: (Аллах андан ыраазы болсун)
– «Эртең менен күн чыкканда адамдарга: эй адам баласы, мен жаңы күнмүн, менден пайдаланып кал. Мен бүгүн кетсем кыяматка чейин кайра келбеймин деп кайрылат» – деп айткан.

Ар бир агарып аткан таңдан кызарып күн батканга чейин акырет үчүн азык камдап сооптуу амалдарды жасоону Аллах Таала баарыбызга насип кылсын. Аллахым ар бирибиздин билип-билбестен жасаган күнөөлөрүбүздү кечиргин. Улуу Жума күнүндө кылган дубаларыбызды кабыл кыл. Адашып туура эмес жолдо жүргөн пенделериңди туура жолго баштагын. үлгү Аллахым, өзүңдүн алдыңа сооп капчыктарыбыз бош, азыгы жок барып калуудан сакта. Асслааму алайкум ва рахматулЛохи ва баракатух!

Запись АЗЫГЫ ЖОК САПАРГА ЧЫКПАЙТ впервые появилась Formula.KG.

Демейде биз инсандар жакшы жашоо, жеп -ичүү, кийинүү үчүн жаралгандан тээ өткөнгө чейин жашоо менен күрөшүп, аракет кылып тырмалап,күндүн суугуна, ысыгына карабай кыштын камын жазда көрүп, ар ким өз эмгеги,мээнети менен кампасын толтуруп, жашоо менен алышып өмүрүбүз кандай өткөкүн да сезбей калабыз. Өкүнүчтүүсү бул зор түйшүк мээнеттер бул дүйнөдө эле калып,убактынча аз гана өмүрүбүзгө пайдасын берип өлөөрдө күл болоору өкүндүрөт! Өлүм хак дегендей узаак болгон акырет сапарына ар бир жандын кетээри чындык. Биз менен кошо кете турган,коргой турган,сактай турган бир гана сооп амалдарыбыз гана болот. Акырет бейиши үчүн Аллах Таалам пенделери үчүн чексиз ырайымы, мээрими менен соопторду жыйып, түбөлүк жашообуз үчүн кампаларыбызды толтуруп алуубуз үчүн бир жылда бир келүүчү мусулмандардын көптөн күткөн Курбан айт майрамын,зульхижжа айынын он күнүн,анын ичинде улуу күн арафа күндөрүнө өзүнүн сан жеткис сооп -сыйлыктарын тартуулады. Ким бул мүмкүнчүлүктү пайдаланган болсо пайдаланды, пайдаланбагандар көптөгөн жакшылыктар,сооптордон кур калды…

Арафат күн – Аллахтын алдындагы эң улуу күндөрдүн бири. Анткени бул күн – күнөөлөр кечирилип, Тозоктон куткарыла турган күн. Ошондой эле ушул күнү Аллах Таала периштелерге Арафатта турган пенделерин айтып сыймыктанат. Бул туурасында Аллахтын Элчиси мындай деп айткан:
«Аллахтын алдында Арафат күнүнөн да улугураак эч бир күн жок. (Ошол күнү) Аллах дүйнө асманына түшүп, Жердеги жашоочуларды айтып асман ээлерине (периштелерге) сыймыктанат. Аллах айтат: «Менин пенделеримди карагылачы! Алар чачтары жүдөгөн, денелери чаң баскаң, (тальбия айтып) кыйкырышып Мага келишти. Алар алыскы жолдордон келишти. Алар Менин ырайымымды каалашат, а бирок Менин жазамды көрүшкөн эмес. Арафат күнүндөгүдөй Тозоктон куткарылган эч бир күн болбойт». (Сахих Ибну Хиббан)..

Аллах Таала Куранда Арафат күнү менен ант берген. Бүткүл улуулуктун Ээси болгон Аллах Таала улуу нерсе менен гана ант берет. Мына ошол күбөлүккө өткөн улуу күн – Арафат күнү. Аллах Таала айтты:
«Күбө болуучу жана күбөлүк кылынган менен ант!». Бурууж сүрөөсү (85:3)
Аллахтын Элчиси айтты:
«Убадаланган күн – Кыямат Күнү, күбө кылынган күн – Арафат Күнү, ал эми күбө болуучу күн – Жума күнү…». (Тирмизи)
Ошондой эле Арафат күнү – Куранда Аллах Таала ант берген так күн.
«Жуп жана так менен ант!». Фажр сүрөөсү (89:3)
Ибну Аббас аяттын тафсиринде: «Жуп (күн) – бул Курбан Айт күнү, ал эми так (күн) – бул Арафат күнү»,– деп айткан.

Арафат күнү Аллах Таала Курандын бул аятын түшүргөн:
«Бүгүн Мен силерге диниңерди толук кылдым, силерге нээматымды толук бердим жана силерге Исламдын дин болушун кааладым». Маида сүрөөсү (5:3)
Бул аяттын улуулугун жөөттөр дагы түшүнүшкөн. Күндөрдүн биринде алар Умар ибну Хаттабка: «Эй, мусулмандар! Китебиңерде айтылган бир аятты силер дайым окуйсуңар. Эгерде ошол аят бизге түшкөндө, анда биз ал күндү майрам кылмакпыз»,– деп айтышат. Умар алардан: «Ал кайсы аят?»,– деп сурайт. Алар: «Бүгүн Мен силерге диниңерди толук кылдым, силерге нээматымды толук бердим жана силерге Исламдын дин болушун кааладым»,– деген аят деп жооп беришет. Ошондо Умар, радыяллаху анху, аларга карап мындай дейт:
«Аллахка ант болсун! Мен ал аяттын кайсы күнү, кайсы убакта, кайсы жерде түшкөнүн жана ошол кезде Аллахтын Элчиси кайсы жерде болгонун анык билемин. Бул аят биз Арафатта турганда Аллахтын Элчиси хутба кылып жатканда түшкөн».
Мына ошол күнү Аллах Таала Өзүнүн динин толук түшүрүп бүтүргөн. Анткени мусулмандар ага чейин Ажылык ибадаттарын аткарышчу эмес. Ошол жылы ажылыктын парз кылынышы менен Исламдын негиздери толукталган….

Арафа күнүн пазилеттер..

4) Арафат күнү тутулган орозо эки жылдык күнөөлөрдүн кечирилишине себеп болот. Бул туурасында Пайгамбарыбыз мындай деп айткан:
«Арафат күндүн орозосу өткөн жана келерки жылдагы күнөөлөрдүн кечирилишине себеп болот деп Аллахтан үмүт кыламын». (Ибну Хиббан)..

«Арафа күнү орозо кармаган адамга Адам алейхиссаламдан Сур’а үйлөгөн күнгө чейин жашаган бардык адамдардын эсеби канча болсо андан эки эсе көп сооп жазылат.»(Р. Насыхин)

«Арафа күнү кармалган орозо миң күн [нафил] орозого барабар.» (Табарани)

«Арафа күнү кармалган орозо эки миң кулду азат кылууга, эки миң төөнү курмандыкка чалууга жана Аллахтын жолунда жихад үчүн берилген эки миң атка барабар.» (Т. Гафилин)

«Арафа күнү кармалган орозо өткөн жана келерки жылдын күнөөлөрүнө кафарат болот.»(Муслим) [Б.а., Арафа күнү кармалган орозо өткөн жана келерки бир жыл ичинде кылынган тооболордун кабыл болуусуна себеп болот.]

«Арафа күнү[Бисмиллах менен]миң Ихлас окуган адамдын күнөөлөрү кечирилип, дубасы кабыл болот»(Абу-ш-ш)

«Шайтан Арафа күнүнөн башка заманда андан да жаман, маскара, пас жана кектүү көрүнбөйт.»(И. Малик)

«Аллаху таала Арафа күнү кымындай ыйманы бар адамды кечирет.»Гунйа)

«Арафа түнү ибадат кылган адам Тозоктон азат болот.»С. Абадиййа) (Ибадат катары илим үйрөнүү эң пайдалуусу. Илмихал окуу аркылуу эң ылайыктуу илим үйрөнгөн болобуз.)

«Дубанын пайдалуусу – Арафа күнү кылынган дуба.»Байхаки)

«Арафа күнүн урматтагыла! Арафа Аллах тарабынан баркталган күн.»Дайлами)(Урмат кылуу күнөө кылбоо менен жүзөгө ашат.)..

Демек мусулман бир тууганым! Мындай мүмкүнчүлүктү пайдаланып калгын! Анткенибул күндөргө канчалаган мусулман бир туугандарыбыз жетпей калды,а сенин бул күндөрдө жашап жатканың эле чоң бакыт! Андыктан бул күндөрү орозо карамап,зикирлерди чалып,дубаларды,тооболорду кылып, Жараткандын жакшылыктарынан,сооп сыйлыктарынан кур калбай шашылып калгын!

Оо,Аллахым! Ар бир мусулман пендесинин ойлогон ой максаттарын,тилеген тилектерин, Сенден чооң үмүттөр менен көтөргөн колдорун кур калтырбай дубаларыбызды кабыл кылгын! Омииийн!

Запись КҮНДӨРДҮН УЛУУСУ ЖАКЫНДА АРАФА впервые появилась Formula.KG.

ОРОЗО БИЗ ҮЧҮН….

ОРОЗО–КҮН УЗУН УБАККА ЭМЕС,ДАРАЖАСЫ БИЙИК УБАКТЫСЫНА КЕЛДИ!

ОРОЗО–КҮН ЫСЫК УБАККА ЭМЕС,СООБУ КӨП УБАКТЫСЫНА КЕЛДИ!

КҮН ЫСЫКТА ОРОЗО КАРМАСАҢ–ТОЗОК АПТАБЫНАН АЛЫС БОЛОСУҢ!

УЗУН КҮНДӨ ОРОЗО КАРМАСАҢ–КЫЯМАТТЫН УЗУН КҮНҮНДӨ КӨЛӨКӨДӨ БОЛОСУҢ!

БУЛ ДҮЙНӨДӨ КУРСАГЫ АЧКАБОЛГОНДОР–АКЫРЕТТЕ КӨҢҮЛҮ ТОК БОЛОТ!

“БИСМИЛЛААХИР РОХМААНИР РОХИЙМ”

Көптөн күткөн берекелүү рамазан айы,
эшик каккылап босогодо турган кези .
Бул бир айга гана созулуп, бир ай конок болуп,
бир ай мугалим болуучу улуу ай .
Келиңиздер ушул мүмкүнчүлүктү бекер кетирбестен бүт ааламдардын Роббиси
Аллах Тааладан дүйнө жана акыретибиз үчүн жакшылыктарды суранып, мекенибиз үчүн,
ата-энебиз үчүн, үй-бүлөө туугандар үчүн
Аллах Тааладан кечирим сурап дуба кылайлы.
Эгерде намаз окуп жүргөн болсок,
башка мусулман бир туугандарыбыз үчүн да дуба кылайлы. Күнөөлөрдөн арылууга зор мүмкүнчүлүк. Ушул жерде айта кетчү сөз,
дубааңыздарда биздей күнөөкөрдү да кошуп коюңуздар, балким дубааңыздардын берекетинен кечиримге жетишээрбиз.

Убакыт ушундай учкан куш ал
кайра кайрылып келбес жака
кетип бараткан кези. Кечээ гана рамазанды узаткан болсок мынтип кайра тосуп турган кезибиз. Көп бир туугандарыбыз бул орозону көргөн жок. Балки, былтыркы орозо алардын өмүрүндөгү акыркы орозо болуп калды.
Бул рамазан айы балким мен үчүн
балким сиз үчүн эң акыркысы болуп калуу ыктымалы бар болушу мүмкүн !
Андыктан достор, мусулман диндештерим,
Аллах Таалага көбүрөөк ибаадат кылып,
ал Затка болгон сүйүүнү көбүрөөк күчөтүп алуучу ушул ай эмеспи ?
Дүйнөдө көп адамдар жылдап-жылдап ачка калып күн кечирип жүрүшсө,
мына ошол бир туугандардын абалын түшүнүп,
Аллах Таалам бизге канчалаган нематтарын берип койгонун сезип, шүгүр кылуучу ай !
Он бир ай курсакты тойдуруп, тамак-аштан
каалагандай жеп, напсинин каалосу менен он бир ай жашадык . Бул, айлардын султаны рамазан айы, өз каалоодон чыгып,
напси каалоосун Аллах үчүн тапшырып,
напсиге эмес Аллага кулчулук кылуу айы.
Бүт шайтандар кишенделип, кээ бир ыйманы бекем инсандар үчүн баардык шайтандар
кишенделет . Күнөөдөн алыс качайлы .

Анда эмесе орозону жемиштүү өткөрү үчүн төмөнкү кеңештерге көңүл буруңуз!

Рамазан айында төмөнкү амалдарды аткарууга аракет кыл!

1.Рамазан айында Таравих жана тахажуд намазын оку! Таравих намазы ыйык Рамазан айында гана б.а. бир жылда бир ай окулуучу намаз. Анын руханий пайдасы, сообу абдан көп. Ал эми Тахажуд намазын орозо мезгилинде окубасаъ качан окуйсуң?!
Ансыз да саарлык ичүү үчүн турасың, ошол мезгилде даарат алып, эки ирекет намаз окуудан эринбе! Балким, чын ыклас менен окулган эки ирекет намаз сени тозок отунан тосуп калуусу мүмкүн. Пайгамбарыбыздын (Ага Алланын салам-салаваты болсун): “Рамазан айында кимде-ким ишенүү жана сооп үмүт кылуу менен намаз окуса, анын өткөн күнөөлөрү кечирилет” деген сөзүн эсиңден чыгарба! Күнөөбүз канча экенин өзүбүз жакшы билебиз, демек орозону пайдаланып калалы!

2.Рамазан айында Куран окууну унутпа!
Бул ай – Куран түшүрүлгөн ай. Бул айда пайгамбарыбыз (Ага Алланын салам-салаваты болсун) Жибрийил периштеге Куран окуп берип турган. Курандын бир тамгасын окуган адамга он сооп иш жазылат.Ал эми Рамазан айында ар бир сооптуу иш жетимиш барабар көбөйөрүн унутпа! Эми элестетип кой бир аят,бир сүрөө окуган болсоң канча сооптун астында каларыңды …

3.Рамазан айында көбүрөөк дуба кыл! Орозо туткан адамдын ооз ачар алдындагы дубасы кабыл болорун унутпа! Өзүңө, ата-энеңе, жубайыңа, балдарыңа, тууган-уруктарыңа жана жалпы мусулман элине жакшылык тилеп дуба кыл!Чын ыклас менен кылган сенин дубаңдын себеби менен, бир туугандарың динге кирип, ырыскың көбөйүп, жашооң жеңилдеп калуусу толук мүмкүн.

4.Рамазан айында садака берүүгө шашыл! Садака кылууга эч нерсем жок деп ойлобо.Бир чөйчөк суу табуу сага кыйынбы? Же бир курма берүүгө да күчүң жетпейби? Рамазан айында бир адамга суу, же курма берип ооз ачырса, анын курсагын тойгузгандай соопко ээ болот. Бул адам Акыретте пайгамбарыбыздын (Ага Алланын салам-салаваты болсун) булагынан суу ичүүгө татыктуу болот.

5.Рамазан айында буга чейин жасаган күнөөлөрүңө тооба кыл! Биз алсыз пенделердин билип -билбей кылган күнөөлөрүбүз ат көтөргүс көп экенин өзүбүз жакшы билебиз. Рамазанда күнөөдөн тазаланып, жеңил чыгууга аракет кыл. Бул айдын алгачкы он күнү – ырайымдуулук, ортоңку он күнү – кечиримдүүлүк, ал эми акыркы он күнү – тозоктон куткаруу экендигин эсиңден чыгарба.

Рамазан айында төмөнкү иштерди аткаруудан сактан!

1. Рамазан айында көзүңдү арамдан сакта! Бул айда башка учурда адал болгон тамактануу сыяктуу иштерден тыйыласың. Анан эмне үчүн башка учурда арам болгон иштен тыйыла албайсың? Орозодо адал иштен тыйылып, арам иштен тыйылбоо, бул – акмакчылык.
Орозонун негизги максаты – арамдан тыйылууну үйрөнүү. Мына ушул мүмкүнчүлүктү пайдаланып кал! Бул ай биз үчүн өзүбүздү жакшы жака тарбиялоону үйрөнүү.

2. Рамазан айында тилиңди арамдан сакта! Адамдардын көптөгөн күнөөлөрү тилдин айынан болот. Ыйык орозодо бир гана ашказанга орозо кармабастан, тилге да орозо кармоо керек. Кыйбат, ушак, жалган, сөгүнүү сыяктуу жаман адаттардан орозо кармап, тилибизди зикир, Куран ж.б. жакшы сөздөр менен алек кылалы! Тилдин айынан орозодо табылчу сооптордон куру кол калбайлы.

3. Рамазан айында урушуп-талашуудан сактан! Орозо – адамды жамандыктан тосуп туруучу көшөгө.
Акыретте тозок отунан тосуучу көшөгө болот. Ошондуктан, аны бузуп албай сактоого аракет кыл! Бул айда башкаларга үнүңүдү көтөрүп сүйлөбө, кечиримдүү бол! Эгер сага кимдир бирөө жаман сөз айтып, сени менен урушуп талашууну кааласа, “Мен орозо кармаган адаммын” деп, бир ооз сөз менен жооп кайтарып кой!

4. Рамазан айында убакытты текке кетирүүдңн сактан! Орозо бул уйкунун, же телевизор көрүүнүн айы эмес. Убактыңды уйку, же башка керексиз иштер менен өткөрбө!
Бул ай бир жылда бир келүүчү, мусулмандын мүмкүнчүлүгү, аны туура пайдалансаъ, ийгиликке жетесиң. Туура эмес пайдалансаң ийгиликтен куру кол каласың!

5. Рамазан айында жаман адаттардан арыл! Арак, тамеки, насыбай сыяктуу жаман адаттардан арылуу орозодо абдан жеңил. Эртеден бери тартпай жүргөн тамекини ооз ачкандан кийин тартууга шашылба! Эртеден бери эмне үчүн тартпай жүрдүң, жакшылап ойлонуп көр. Жаратуучу Алланын буйругун аткарып, эртеден бери тартпадың, ал эми ооз ачкандан кийин эмнеге тартып жатасың?! Же Алланын буйругун кщндщз аткарып, кечинде аткарбай койсо боло береби? Жок. Ойлон. Аракет кыл. Дуба кылып, сурангын. Мындай жаман адаттардан кутулуу сен үчүн кыйын эмес!

Дегиеле орозонун улуулугун, ыйыктыгын,чексиз берекесин сөз менен айтып калем менен түгөтө алмак эмесбиз. Анткени бул айда Аллах Таалам сообун Өзүм берем дегенин ! Аллах Тааланын Мээриминин унутпайлы,Кечириминин,Ырайымынын чеги жок! Демек биз үчүн бул табылгыс мүмкүнчүлүк! Анда эмесе келиң бир тууганым орозо кармоого биргеликте бекем ниет менен камданалы!

Орозоңуздар кабыл болсун! Биз менен бирге болуңуздар бакыттын түгөнбөгөн узун жолдорунда бирге бололу! Бактылуулук Формуласы! Бактыңыздын багыты!

Али Оши~

Запись КОШ КЕЛДИҢ ЫЙЫК РАМАЗАН! впервые появилась Formula.KG.